آنا ديلي گونونوز موبارك اولسون

سايين ديلداشلار بايرام (اسفند) آيينين ايكيسي(21 فوريه) دونياليق آنا ديلي گونودور، بو گونو بوتون اينسانلارا اؤزلليك له تورك ديلليلره تبريك دئييرم.

آنا ديلي اينسانلارين ياشاييشيندا اؤنملي رول اوينايير،بوتون اينسانلار اؤز آنا ديللرينده استعدادلاري بللي اولونور و اوزه  چيخير،يعني هر اينسان بوتون دوشونجه لريني اؤز آنا ديلينده دوشونور و دونيايا سؤيله يير.،ايستر اؤز ديلينده سؤيله سين ،ايسترسه ده باشقا ديلده دوشونجه سين بللي ائتسين،آنجاق بو اونون آنا ديلينده يارانيب سؤيله نيلن دوشنجه دير.

اؤرنك اولاراق ، ديرلي يازيچيميز رحمتليك «غلامحسين ساعدي» بوتون يازيلاريندا توركجه دوشونوب و باشقا ديلده يازيب و دوغروداندا اثرلري بعضا تايسيز اولا بيليبدير.

بو آرادا هر كيمسه اؤز آنا ديليندنده ييه (صاحب) چيخماليدير و اونا قوللوق ائتمه ليدير.رحمتليك اوستاد «شهريار» بو ايشده باشاريلي اولوب و عؤمروندن نئچه ايل كئچندن سونرا آنا ديلينه قوللوق ائتمه ييي دوشونوب و تورك ديلينه بؤيوك بير قوللوقچو اولوبدور.چاغداش زاماندا شهريار،«حيدر بابايا سلام» اثريني يازماقلا آذربايجان توركجه سينه يئني بير روح ايله جان وئريب و عئيني زاماندا اثري دونيا سئويه سينده ان ديرلي اثرلردن اولوبدور.

بونلاري دئمكده بونو بيلديرمه لليم كي هر كيمسه اؤز يئرينده و نووبه سينده آنا ديلينه سايغي و حورمت ساخلاييب اونو اوجا يئرلره يئتيره بيلر.

اوشاغا توركجه آد قويوب اونا هر ديلدن اؤنجه اؤز آنا ديليني اؤيرتمك ان كيچيك بير ايش اولا بيلر و هر بير تورك اينساني ان آزي بو ايشي گؤره بيلر.

بوتون ديللر «تانري»- دان بيزيم اوچون بؤيوك بير پاي و نعمت دير و بو ديللري قوروماق(حفظ ائله مك) بوتون اينسانلارين گؤره ويدير(وظيفه سيدير).

آنا ديلينين يانيندا باشقا ديللريده اؤيرنمه لييك و بؤيوك لريميز دئميش كن «نئچه ديل بيلن ،نئچه اينسان دئمكدير».

هئچ ديله سايغيسيزليق ائتمه مه لييك و بونون يانيندا نئچه ديل باجارديغيميزا رغماً آنا ديليميزين باجارماغي و اونو قوروماغي هئچ واخت اونوتمامالييق.

و سونوندا دئمه لييم:

آنا ديلي بير ميللتين چيرپينان اوره گيدير..

بو اورك دؤيونسون دئيه آنا ديليميزي گله جك نسيل لريميزه قورويوب وئرك.

ساغ قالين – ائلمان اورمو اوغلو