رامين جهانگيرزاده 

اورمو گؤلونه تؤكولن  21 ايرماق و 39 جيغير سو يوللارينين قاباغي كسيليب، 5700 كيلومترليك گئنيشليي اولان بو گؤلون سويو 3000 كيلومتري شورانليغا چئوريلركن، 60 فاييز آدالاري قوراقليغا ياپيشيبدير.  

دئييلنره گؤره اوچ ايلدن سونرا دونيانين ايكينجي شور سويونا ماليك اولان اورمو گؤلو، شورانليغا چئوريله­جك.  

دئييرلر هر كس آغ گئيينسه آغ گونه چيخاجاق. آنجاق بيزيم بو گؤزل گلينيميز، آغ گئيينندن سونرا قارا گونه دوشوبدور. او قدر ايچدييي سولارين يولونو باغلاييبلار كي، داها او  هر درده درمان اولان زيغلارينين اييلنميش قوخوسونو دا دويماق اولمور. ايندي آذربايجان آشيقلاري بو گؤلون قيراغيندا باياتي اوخوماغا ورديش ائديبلر و بو ايناملا ياشاييرلار كي بير كور اوغلو تاپيليب، بو گؤزل گلينه اورك وئرركن، بير ماهني­ايله اونا يئني جان باغيشلاياجاق. كور اوغلو گلمه­سه، بو آغ گئييملي گلينين شور باختينا كلمه دئييب آغلامالي­ييق…!»

بيلميرم هاردان باشلاييم!!! باشيم داشير بوشلوقلاردان، بوشون بوشلوغونون ندنيني آختاريرام. آرخامدا قالميش دولو گؤلون، قاباغيمدا بوشلوغونو گؤرورم. رسميني آراييرام، آراسيندان سيلينميش 60 فاييزا ياخين آدالاريني، دؤرد يؤنوندن يئنيلميش سولارين دالغاجيقلاريني، دالغاجيقلارينداكي سسلريني، سسلرينده­كي هوسلريني ايزله­ييرم. ايزلريني تاپا بيلميرم.  

بوراسي اورمو گؤلو! بو گؤلده نه باش وئريب آنلاميرام. آنلامازلارين يوردوندا، آنلاماق بير آز چيتين اولور. قارا گونه قالميش آغ گئييملي گلينين گولوشو هر آن قورويور. قوروسو قورويا قاريشير. قارشيسيندا يئددي باشلي اژدهالارين باشيني گؤروب، باشيني سالير آشاغي، ائنير آشاغي. گؤيه چاتماق بير آز چتين اولور. ايچي، ايچينه دولوب، بورلور. «آرتميالار»ين سويقيريمينا دؤزه بيلمير. دوزلاقلارين ايچينه باتير. آغ ياشماغيني اوزونه چيكيب، چؤكور اؤزونده. دوزولور دوزلاقلار دوزنليينده.  

دولوب بوشاليرام ايچينده­كي شورانليقلاردا. شرريني باشلاريندان ائدنلر، سني بوشاماق ايسته­ييرلر حياتدان. سني صحرايا چئوريب، سنده دوه بئجرتمك ايسته­ييرلر دوه­بئيين­لر. دور! سؤزو سؤزدن آل، آلنيني آچ، دوه­بئيين­لر صحرايا چئوريلدييني گؤروب سئوينه­جكلر. يامسيلاياجاقلار سني دوه­لر. كاروانلارين زيقيرولو سسلريندن اويناياجاق كار قولئيباني­لار.  

دور بو قدر چؤكمه اؤزونه اورمو گؤلو! گولوشونو قوروتماق ايسته­ينلري اؤزونده بوغ، اؤزونو يئني­دن دوغ! دوغولماق هر آن حياتا قاييتماقدير. قاييت اؤزونه! ايزله اؤزونو! آديني دامغالا دالغالارينا. داغلارين آرخاسيندان اوچا ـ اوچا يئنه ده گلسينلر «فلامينقو»لار. قونسونلار اوره­يينه، سسلريني سالسينلار سسينه. سسين سسلرينه قاريشسين.   

دور آذربايجانين گؤزل گليني اورمو گؤلو! دور «بحر­الميت» اوردوندا و «سالت­ليك» آمريكادا يئنه ده سنه قيسقانسينلار.  

  پيـتراق